“Монгол цэргийн өдөр”, Зэвсэгт хүчний 103 жилийн ойг угтан зохион байгуулсан Засаг даргын нэрэмжит “Марш тактикийн аварга тасаг” шалгаруулах тэмцээн өчигдөр боллоо.
Тэмцээнд төрийн цэргийн болон хууль сахиулах 7 байгууллагаас 12 баг 120 хүний бүрэлдэхүүнтэйгээр оролцож, хурд хүч, тэсвэр хатуужлаа сорив. Тэмцээний нээлтэд аймгийн Засаг даргын орлогч М.Түмэнжаргал бусад холбогдох албаны хүмүүсийн хамтаар оролцож бие бүрэлдэхүүнд амжилт хүслээ.

Хүүхэд залууст цэрэг эх оронч үзэл төлөвшүүлэх, иргэдэд цэргийн ажил мэргэжлийг ойлгуулах зорилгоор энэхүү тэмцээнийг жил бүр зохион байгуулдаг уламжлалтай.
Монгол Улсын Ерөнхийлөгчийн санаачилгаар 2024 оныг төрийн цэргийн байгууллагын хэмжээнд ахлагчийн жил болгон зарласан. Тэр утгаараа энэ жилийн “Марш тактикийн аварга тасаг” шалгаруулах тэмцээнийн онцлог нь алба хаагчид, төрийн цэргийн байгууллагын гол үндсэн бүрэлдэхүүн ахлагчийн бие бүрэлдэхүүний мэргэжлийн ур чадварыг нэмэгдүүлэх, дадлага чадварыг дээшлүүлэх байв.



Аймгийн Засаг даргын нэрэмжит 2024 оны “Марш тактикийн аварга тасаг” шалгаруулах тэмцээний ялагчаар Онцгой байдлын газрын Гал унтраах аврах 56 дугаар анги шалгарч, хоёрдугаар байранд Зэвсэгт хүчний 110 дугаар анги, гуравдугаар байранд Дотоодын цэргийн 816 дугаар анги тус тус орлоо.

Мэдээллийн төв