Аймгийн ИТХ-ын 18 дугаар хуралдаанаар Жендэрийн эрх тэгш байдлыг хангах хөтөлбөрийн 2023 оны хэрэгжилтийн тайланг хэлэлцлээ. Нийгэм дэх эрэгтэй, эмэгтэй хүмүүсийн тэгш оролцоог бий болгох жендэрийн үзэл баримтлалыг бүх төвшинд бодлогоор дэмжих зорилгоор тус хөтөлбөрийг аймгийн ИТХ-ын 2020 оны нэгдүгээр сарын 8-ны өдрийн хуралдаанаар баталсан.
2023 онд хөтөлбөрийн хэрэгжилтэд 60 сая төгрөгийн санхүүжилтыг төсөвлөж, жендэрийн эрх тэгш байдлыг хангах, олон нийтийн ойлголт хандлагыг өөрчлөх Жендэрийн үндэсний хөтөлбөрийн хэрэгжилтийг хангах зорилгоор олон талт арга хэмжээг зохион байгуулжээ. Энэ онд хөтөлбөрийн хүрээнд 3 зорилт, 14 арга хэмжээг хэрэгжүүлснээр 97,3 хувийн биелэлттэй дүгнэгдэж байна. Үүнийг 2022 оны хэрэгжилттэй харьцуулахад 5,6 хувиар нэмэгдсэн үзүүлэлт юм.
Хөтөлбөрийн зорилтын хүрээнд хэрэгжүүлсэн үйл ажиллагаанаас онцолбол...
“Иргэд олон нийтэд, жендэрийн талаарх мэдлэг ойлголтыг сайжруулж, жендэрийн тэгш байдлыг хангах чиглэлээр сургалт нөлөөллийн үйл ажиллагаа зохион байгуулах” зорилтын хүрээнд:
Бүх нийтийн жендэрийн боловсролыг нэмэгдүүлэх зорилгоор 36 удаагийн олон нийтийн болон бүлгийн арга хэмжээг зохион байгуулж давхардсан тоогоор 22 мянган иргэнийг хамруулжээ. Мөн жендэрийн эрх тэгш байдлыг хангах чиглэлээр БОЭТ-д эрчүүдийн кабинетыг орон нутагт анх удаа байгуулж, хүний нөөц, байр, багаж, тоног төхөөрөмжийг үе шаттай хангаснаар 2022 оны улсын хэмжээнд сайн туршлага болсон.
2023 онд БОЭТ-ийн эрэгтэйчүүдийн кабинетэд мэргэшсэн эмч 1-ээр нэмэгдэж 180 сая төгрөгийн шээлгүүрийн дурантай болсноор лавлагаа шатлалд Улаанбаатар явах урсгалыг 30 хувиар бууруулсан. Тус төвөөр үйлчлүүлсэн нийт иргэдийн 58 хувь нь анх удаа үзүүлсэн иргэд байгаа нь 2021 онтой харьцуулбал 2 дахин нэмэгдсэн үзүүлэлт юм.
Жендэрийн мэдрэмжтэй бодлого, төлөвлөлт, төсөвлөлтийг орон нутагт хэрэгжүүлэх чадавхыг бүрдүүлж, жендэрийн эрх тэгш байдлыг хангах хуулийн хэрэгжилтийг хангах ажлыг зохион байгуулах” зорилтын хүрээнд:
Жендэрийн салбар хорооны үйл ажиллагааны хэрэгжилтийг тайлагнах, уялдаа холбоог эрчимжүүлэх зорилгоор салбар хорооны зөвлөлийн хурлыг 2 удаа, Жендэрт суурилсан хүчирхийллийн эсрэг 16 хоногийн аян, “Бүх хайраа гэр бүлдээ”, “Хүндлэл хамгийн тод гэрэл уриан дор” “Хөгжилд хамтдаа” зэрэг 13 төрлийн арга хэмжээнд давхардсан тоогоор 26500 иргэнийг хамруулсан байна.
“Жендэрт суурилсан хүчирхийлэл, ялгаварлан гадуурхалтаас сэргийлэх бүх төрлийн үйл ажиллагааг зохион байгуулах” зорилтын хүрээнд:
Аймгийн хүн амын 51 хувь нь эмэгтэйчүүд. Эмэгтэйчүүдийн хөдөлмөр эрхлэлт 14937 байгаа нь хөдөлмөр эрхэлж буй хүн амын 48 хувийг эзэлж буй аж. Гэр бүлийн хүчирхийллийн хохирогчид үйлчлэх түр хамгаалах зориулалтын байргүйгээс 2020 оноос эхлэн орон сууцны 3 өрөө байр түрээслэн түр хамгаалах зориулалтаар ашиглаж байна. Хоногт 6 хүнд хамгаалах үйлчилгээ үзүүлж, жилд дунджаар 100 гаруй хүүхэд болон насанд хүрэгчдэд хамгааллын үйлчилгээ үзүүлжээ. Улсын төсвийн хөрөнгө оруулалтаар 2020 онд 1.7 тэрбум төгрөгийн хөрөнгө оруулалтаар “Түр хамгаалах байр” ашиглалтад оруулахаар эхлүүлж, 79 хувийн гүйцэтгэлтэй байна.
Мэдээллийн төв
