Өвөлжилтийн нөхцөл байдал хүндэрч байгаатай холбогдуулан аймаг сумдын аюулгүйн нөөцөд байгаа өвс тэжээлийг малчдад үнэ төлбөргүй олгох ажил энэ долоо хоногт эхэллээ.
Тодруулбал аймгийн аюулгүйн нөөцөд байгаа 50 тонн өвс, 61.1 тонн тэжээл, Жаргалант сумын аюулгүйн нөөцөд бэлтгэсэн 70 тонн өвс, 10 тонн тэжээлийг энэ долоо хоногоос эхлэн малчдад олгож эхлээд байна. Өнөөдөр Жаргалант сумын Жаргалант, Улаантолгой багийн малчдад олгох ажээ.
Ингэхдээ өвс тэжээл нь дууссан малчдын судалгааг сайтар гаргаж, цаг хугацаа алдалгүй нэн шаардлагатай, зорилтот бүлгийн малчин өрхүүдэд хүргэх шаардлагатай гэдгийг Аймгийн Засаг даргын орлогч М.Түмэнжаргал албаныханд анхаарууллаа.
Энэ жил манай аймгийн хэмжээнд 1380 малчин болон мал бүхий иргэдийн 175,329 толгой мал өвөлжиж хаваржиж байгаа. Өнөөдрийн байдлаар малын хоргодол 1400 давсан нь өмнөх долоо хоногтой харьцуулахад нэг дахин нэмэгджээ.