Аймгийн Засаг даргын захирамжаар Баян-Өндөр сумын 5 чиглэлд, Жаргалант сумын 6 чиглэлд ажлын хэсэг гарч, малчдад төрийн үйлчилгээг үзүүлэх, нөхцөл байдлыг газар дээр нь үнэлэх ажлыг энэ сарын 22-25-ны өдрүүдэд зохион байгуулсан.

Нийт 11 чиглэлд 44 албан хаагч гарч 251 малчин өрхөөр орж цаг үеийн байдалтай танилцан, төрийг үйлчилгээг үзүүлсэн байна. Тодруулбал, эрүүл мэндийн үйлчилгээг 261 иргэнд үзүүлснээс 0-5 насны хүүхэд-49, жирэмсэн эмэгтэй-3 өндөр настан-111, хөгжлийн бэрхшээлтэй иргэн 12 байна.

Аймгийн Засаг даргын даваа гаригийн Шуурхай зөвлөгөөнөөр Засаг даргын орлогч М. Түмэнжаргал “Жирэмсэн, өндөр настай гэхчлэн эрүүл мэндийн тусламж үйлчилгээ зайлшгүй шаардлагатай иргэдээ онцгой анхаарахыг холбогдох байгууллагуудад үүрэг болголоо. Тэрээр, өнгөрсөн баасан гаригт цас ихтэй, хаваржилт хүндэрч болзошгүй газар байгаа малчдаа эргээд ирсэн. Зарим газар унаа явах боломжгүй, зам харгуй их хүнд байна. Хол хаваржиж байгаа малчидаа сайн анхаараарай. Яаралтай үед очих машин техник хэрэгслийн бүрэн бүтэн байдлаа хангаж” ажиллахыг сануулав.

Түүнчлэн аймгийн Мал эмнэлгийн газраас малын гоц халдварт өвчний тандалт судалгааг 32.5 мянган толгой малд хийхэд гоц халдварт өвчний шинж тэмдэг илрээгүй байна. Өнөөдрийн байдлаар 10 аймгийн 36 суманд малын гоц халдварт өвчин дэгдээд буй.